एउटा फूल हाँस्दैमा नै

-नदीश

एउटा फूल हाँस्दैमा नै वाग हाँस्छ र ?

एउटा मान्छे बाँच्दैमा नै धर्ती बाँच्छ र ?
रित्ता थैली भर्न जसले आफैलाई नै बेच्नुपर्छ
जून तारा छुने उसले सपना साँच्छ र ?

जीवन खोज्दै हिँड्नेहरु पल-पल मुर्छा पर्छन्
जीवन बीच सड्नेहरु ज्यूँदो बनी भ्रम छर्छन्
तिमी खुसी बाँड्छु भन्छौ दुखीलाई निमन्त्रणा
दैनिक तिम्रो जन्मदिनमा भोको नाच्छ र ?

कोटभित्रै खोट सबै लुक्छ भन्छौ तिमीहरु
नाङ्गो शरीर हुनेहरु लाज ढाकी हिँड्छन् बरु
मिली बस्नु पर्छ भन्छौ सयौँ थुङ्गा बराबरी
फूलमा काँडा मिसाई कोही माला गाँस्छ र ?