साहित्यमा अलग अभियान

source: www.alagabhiyan.blogspot.com

आजभन्दा चार वर्षअघि स्थापित, प्रगतिवादी युवा साहित्यकारहरुको समूह हो अलग अभियान

। यसले विभिन्न साहित्यिक अभियान/गतिविधिहरु संचालन गरी सामाजिक/साँस्कृतिक रुपान्तरणको अभियानमा लेखनमार्फत सहभागिता जनाइराखेको छ । स्थापनाकालदेखि नै विचारको नाममा नारा र कलाको नाममा खोक्रो सिर्जना, दुवैको विपक्षमा रहँदै निरन्तर लेखनमा वैज्ञानिक विचार र प्रभावकारी प्रस्तुतिको निम्ति यसले आफ्ना सम्पूर्ण प्रयत्नहरु केन्द्रित गर्दै आएको छ ।

समूह संरचना

अलग अभियान संयोजक-अभियन्ता संरचनामा रहेको छ । यस अभियानमा हालसम्म ४६ जना युवा लेखकहरु आबद्ध छन् ।

विधागत विभागहरु

अलग अभियान अन्तर्गत कविता, गीत र गजल गरी तीन विधागत विभागहरु छन् । विधागत विकास र व्यवस्थापनको निम्ति विभागहरुको निर्माण गरिएको हो । यी प्रत्येक विभागहरुले नियमित अन्तरकृया लगायतका गतिविधिहरु  संचालन गर्दै आएका छन् ।

अभियान/गतिविधिहरु

यसले आफ्ना उद्देश्यलाई पछ्याउँदै सलामबिहानी डटकम, सिर्जना सागर, शब्दशिखा, अलग अभियान ब्लग लगायतका अभियान/गतिविधिहरु  संचालन गर्दै आएको छ ।

सलामबिहानी

अलग अभियानको सबैभन्दा जेठो अभियान हो www.salambihani.com । समूहको स्थापनाकालदेखि नै यो निरन्तर संचालनमा छ । यसमा कविता, गीत र गजल गरी हरेक हप्ता तीन सिर्जना प्रकाशित भइरहेका छन् । यी बाहेक यो वेवसाइटमा लघुगद्य सिर्जनाहरु (कथा, निबन्ध, आलेख), विभिन्न भाषाका सिर्जनाहरु र साहित्यिक समाचारहरु पनि प्रकाशित भइरहेका छन् ।

सिर्जना सागर

साहित्यिक/साङ्गीतिक सिर्जना वाचन/श्रवनको कार्यक्रम हो 'सिर्जना सागर’ । २४औँ शृङ्खला पार गरिसकेको यो कार्यक्रम ललितपुरको लगनखेलस्थित नमूना उ. म. वि. मा हरेक महिनाको दोस्रो शनिबार संचालन हुँदै आएको छ । यसको संचालकमा अखिल 'नेपाल लेखक सङ्घ, ललितपुर' पनि रहेको छ ।

शब्दशिखा

'शब्दशिखा’ साहित्यिक मासिकको पहिलो अङ्क २०६६ जेठमा प्रकाशित भएको थियो । यसमा कविता, गीत र गजलको अलवा साहित्यका विभिन्न लघुविधाहरु प्रकाशित हुँदै आएका छन् ।

अलग अभियान ब्लग

समूहको सम्पूर्ण जानकारी दिने उद्देश्यसहित साचालित ब्लग हो www.alagabhiyan.blogspot.com । यसमा समूहको दस्तावेजहरु, सदस्यहरुको सिर्जना एवम् समूहका प्रत्येक गतिविधिहरुको जानकारी समाविष्ट गरिएको छ ।

अन्तरकृया

अलग अभियानले प्रत्येक महिनाको पहिलो शनिबार कविता अन्तरकृया, तेस्रो शनिबार गीत अन्तरकृया र चौथो शनिबार गजल अन्तरकृया गर्दै आएको छ । यसबाहेक समूहले 'प्रभास कविता अन्तरकृया १ र २’ 'शेर शल्यकृया(गजल अन्तरकृया १ र २'(गजल अन्तरकृया)’ 'अन्तरकृयामा अन्तरा १(गीत अन्तरकृया) जस्ता बृहत एवम् व्यवस्थित अन्तरकृयाहरुको आयोजना गरिसकेको छ ।

अलग अभियान आफ्ना अभियान/गतिविधिहरुलाई आगामी दिनमा अझै प्रभावकारी रुपमा अगाडि बढाउने प्रतिबद्धता पेश गर्दछ ।