मञ्जुर ?

विशद

अब पाउरोटीको सोफामुनि रातारात भेटिँदैछन्
चटपट खाएर फालेका पुराना कागज
यहि कागज थमाएर शीतलहरको हातहातमा
यो मौसम बाँड्दैछ एक हिउँदको संविधान
के मञ्जुर हुनुहुन्छ ?

सर्वोच्च चोमोलुङमालाई कुप्री पर्न लगाएर
धरहरा अझ अग्लिँदैछ
कतै घोषणा हुन बेर छैन
नयाँ सर्वोच्च शिखर 'धरहरमाथा'
के मञ्जुर हुनुहुन्छ ?

खोलीमा छरेर मन्द विष
सुस्ताएको माछा हेरेर बोल्छन् नाथ
'कति शान्त छ मेरो घर
सुत्न देउ यहि स्थिर चिहानमा'
यहि एकल धार्मिक सभामा सुत्न
के मञ्जुर हुनुहुन्छ ?

तपाइँलाई कागज मात्र चाहिएको हो भने
टन्नै छन् डम्पिङ साइडहरू
खोज्नू ।