त्यो धाराको पानी

नाकारा


घरमाथिको मुहानमा
एक्कासी धाराहरु ठडिएको दिन
कलकल बग्दै रावा खोलामा मिसिने
पानीको गोरेटो मेटिएको हो

घाँसको भारी बिसाएर
प्रत्येक दिन
मलताको पात
कि त निभाराको पात कोप्य्राएर
र कहिलेकाहिँ, आफ्नै अञ्जुलीले उघाएर
पानी पिउने आमाको दिनचर्या पनि
पुरिएको हो

सँगसँगै,
मार्सीधान, फापर बारी र घुरेनको जौँ बारी
आँगन डिलको मखमली र तितेपाती सुकेको हो
र हिरिक्कै भा'को हो
मसुम कुनाको अदुवाको बोट

ए, मूर्ख सन्तान हो !
अझै के पिइरहन्छौ त्यो धाराको पानी ?